Telebih dulu aku meri Selamat Hari Raya Aidilfitri ngagai bala-bala ke nyambut pengerami Hari Raya. Nyadi lebuh maia cuti sekulah tu tadi, aku bisi pulai ke menua lalu berandau enggau bala ba menua mega. Bala sida ke tuai-tuai lalu bisi madah ke aku pasal temuai ari menua luar ti bisi datai ngagai menua kitai Semada Belatok aja.

Maia malam ari enam , 26 September 2009 dia Tuai Rumah bisi mai semua begempuru (meeting). Lalu dia Tuai Rumah madah ke pasal temuai ari luar bisi deka datai ngagai menua kitai Semada Belatok. Nyadi batang pejalai sida nya, ianya deka meda menua kitai. Dalam langgur pejalai sidanya engka nya deka begaga ke tempat pelancongan/homestay. Nyadi penyampau sida ia bisi kira-kira 20 iko. Sida dijangka datai maia 30 September 2009 (Rabu).

Berita tu di terima Tuai Rumah ari Biak Sigon. Dia Biak Sigon madah ke sida tu deka di ketuai ulih Kaunselor DSP (rtd) Harrison Lunsa (Lading). Dipelaba ke sida tu ianya bala pelabur ti deka ngaga endor alai pelancongan ba menua kitai. Berita tu manah amai ba aku, laban utai ti baka tu ngarap ke bisi meri pengintung mega ngagai penduduk semada empu. Ngarap ke meh. Dalam masa nya mega kitai anang enda bejimat-jimat ba senentang hal tu, laban nangi ke utai ti enda manah baka utai ti deka nipu/ngelakar kitai kelebih agi ngagai bala ti di menua. Tapi enti utai tu mujur ngarap ke kitai semua bisi bulih pengutung mega ari utai ti bakatu.

Berita tu bedau nyengenda agi sampai ke sida nya ila amai-amai datai leboh 30 September 2009 tu ila. Enti kitai ke bukai ti diau ba negeri tu bisi bala ba menua Semada din, tau-tau meh betanya ngagai sida ia ba pekara tu.

Sekali agi aku madah “Sama-sama meh kitai ngemaju ke Menua kitai Semada Belatok”.

Moderator
Watt Michael